17/09/17

Feliz Aninovo 5778! Shaná Tová!


Desde a Asociación Galega de Amizade con Israel queremos desexar a todos nosos socios e amigos xudeus, así como a toda a comunidade xudía en Galicia, en Israel e nos catro puntos cardinais da Terra, un moi Feliz Aninovo 5778. 

Que os nosos nomes sexan inscritos no Libro da Vida.


31/08/17

Xornada Europea da Cultura Xudía 2017


Esta fin de semana celébrase en toda Europa a "Xornada Europea da Cultura Xudía". Este ano dedicado a un tema de forte vencello e sabor galego como son as "Diásporas". Aquí en Galicia hai actividades en Monforte de Lemos, Tui e Ribadavia. 



24/08/17

Derruba Israel escolas palestinas por sadismo?


En relación á nova que podedes ver na imaxe, e que apareceu publicada en diversos medios, aclarar que os módulos construídos con financiamento da Unión Europea non foron "derrubados", foron desmantelados e retirados. 

Indicar tamén que esta construción estaba segundo os vixentes Acordos de Oslo asinados entre Israel e a Autoridade Palestina na denominada "Zona C" de administración israelí. Isto quere dicir que para poder levar a cabo unha edificación é preciso ter o permiso necesario expedido pola Autoridade Civil israelí.

Estes módulos desmantelados non só non tiñan os permisos de edificación senón que recibiran ordes reiteradas de paralizar a súa montaxe e construción.

Pero os promotores fixeron caso omiso as comunicacións oficiais que ordeaban a paralización da construción mentres esta non tivera licenza administrativa. Con certeza os promotores da construción o que buscaban a mantenta era a fotografía do "malvado soldado israelí destruíndo unha escola e deixando a cativos palestinos sen aulas". Sen dúbida os promotores utilizaron aos rapaces como “señuelos” e a Unión Europea como amplificador da repercusión da nova.

Pódese construír? Por suposto. Pero é preciso ter licenza e non se pode edificar onde a un boamente lle pete, cando lle pete e como lle pete.

Un exemplo: Poñamos por caso que o Estado de Israel por medio do seu Ministerio de Cultura fai unha doazón para subvencionar a construción dun edificio como sede en Galicia da nosa Asociación. Implicaría isto que AGAI podería construír en calquera lugar e sen ter licenzas nin autorizacións?

Por suposto que non. Pois en Israel tampouco.

Desde a Asociación Galega de Amizade con Israel lamentamos a situación que afecta aos cativos, vítimas da irresponsabilidade dunhas organizacións que os utilizaron coma armas políticas para lanzar mediaticamente contra Israel.

Desde a Asociación Galega de Amizade con Israel desexamos que a situación se resolva o antes posible e os nenos e nenas poidan estudar sen ser utilizados politicamente.


11/08/17

Frank Sinatra e Israel

Frank Sinatra, unha figura icónica do século XX, sempre defendeu a Israel e nunca esqueceu a súa coidadora xudía de cando cativo en Hoboken, New Jersey

Frank Sinatra era ben coñecido polo seu forte apoio e activismo a prol de Israel, cousa que lle valeu estar na "lista negra" da Liga Árabe como parte do seu boicot contra Israel. Sinatra era un activo recaudador de fondos para a Israel, en especial para a Universidade Hebrea de Jerusalén así como para outras moitas institucións israelís, Sinatra tamén participou nas mobilizacións e protestas que tiveron lugar en Hollywood durante o Holocausto.

Sinatra acostumaba usar unha medalla ao pescozo en forma de mezuzá. A mezuzá foi un agasallo de súa veciña xudía, a sra. Golden, que era quen mentres a nai de Sinatra ia traballar coidabao e falaballe en idiche.

Tras a Guerra do Yom Kippur, Sinatra fixera pública unha doazón persoal de 300,000 dólares para a Israel "en memoria da sra. Golden, de Hoboken".

Deixámovos aquí un pequeno vídeo que amosa como Sinatra, un americano fillo de inmigrantes italianos, tiña un forte vencello con Israel



07/07/17

Anulado xudicialmente o acordo de boicot a Israel do Concello de Teo




Este pasado xoves día 6 de xullo de 2017 o Xulgado Contencioso Administrativo nº 2 de Santiago de Compostela ven de anular o boicot a Israel aprobado polo Concello de Teo. Esgrime o Tribunal que non só o Concello carecía de facultades para aprobar unha resolución que interferise coa política de asuntos exteriores do Estado, senón que tamén existen evidentes compoñentes discriminatorios na moción.

Ademais, a decisión xudicial incide poderosamente na idea de que resolucións do tipo emitidas polo Consello de Seguridade das Nacións Unidas non proporcionan base legal algunha para boicotear ás institucións, empresas ou organizacións israelís.

O 31 de marzo de 2016 o Concello de Teo aprobou unha moción de adhesión ao boicot a Israel. Dita proposta de adhesión ao movemento BDS foi presentada desde as formacións locais do BNG e Teo-Anova. Devandito texto recollía o compromiso municipal "a non establecer convenio, contrato ou acordo de tipo político, comercial, agrícola, educativo, cultural, deportivo ou de seguridade con institucións, empresas e organizacións israelís".

O Concello recibiu o selo aprobado polo BDS que distinguía á cidade como "Espazo Libre de Apartheid Israelí", baixo a condición de que fose difundida a campaña de boicot entre a cidadanía, comercio e empresas locais. O Concello acordou comprometerse e promover a cooperación co movemento BDS para asegurar a correcta implementación da decisión adoptada.

Coa recente sentenza reafírmase o carácter claramente discriminatorio e decididamente hostil contra Israel, os seus naturais e todo aquel que simpatice co país hebreo.

Grazas ás iniciativas legais presentadas por ACOM, 12 acordos de boicot foron anulados pola Xustiza (incluídas 2 sentenzas de Tribunais Superiores de Xustiza contra os boicots), 6 Concellos revogaron voluntariamente devanditos acordos tras coñecer as iniciativas xudiciais, e 1 concello se atopa co acordo suspendido xudicialmente ate sentenza definitiva.